Diwani Kata Ya Majengo Awasihi Wananchi Kufanya Kazi Kwa Bidii

DIWANI wa Kata ya Majengo mkoani hapa Nicholaus Msemo amewataka wakazi wa eneo hilo kuacha kulalamika bali wafanye kazi kwa bidii bila kuchagua huku wakizingatia nidhamu ya fedha.

Amesema hayo wakati akizungumza na gazeti  la Mfanyakazi kuhusu masuala mbalimbali yanayohusu maendeleo ya kata hiyo katila siku 100 baada ya uchaguzi mkuu.

Amesema pamoja na mipango  na mikakati ya maendeleo aliyopanga kufanya katika kata hiyo lakini pia  ni muhimi kwa wakazi wa eneo hilo kuhakikisha wanafanya kazi kwa bidii  ili kujikwamua kutoka sehemu moja kwenda nyingine.

“Ni muhimu kuacha kulalamika, kwamba kazi hii haifai mara ile ndio  imayofaa, ni vyema wananchi  kujikita kufanya kazi kwa bidii lakini pia kuwa na nidhamu ya fedha kwa kuitumia katika masuala ya msingi, ” Amesema Msemo na kuongeza kuwa nia yake ni wananchi kupewa elimu ya mikopo na kufanya kazi kwa bidii.

Kuhusu siku 100 baada ya uchaguzi amesema  ameondoa kero ya malipo kwa wananchi wake wanapohitaji huduma  yoyote kutoka serikali za mitaa ambapo gharama zote atahudumia yeye diwani.

“Ilikuwa ni kero kwa wananchi maana wakati mwingine walipohitaji huduma sio wote waliokuwa na fedha kwa ajili ya kulipia huduma hizo kama kupata barua za utambulisho, ” Amesema Diwani Msemo na kuongeza kuwa   hata malipo yanayotakiwa kwa wanafunzi wa madarasa ya mitihani  katika Kata hiyo atakuwa akiwajibika yeye.

Amesema katika siku 100 ameweza kukarabati shule ya msingi na sekondari iliyopo katika Kata na kwamba changamoto yaaji taka inaendelea kufanyiwa kazi.