Na Mwandishi Wetu
MKURUGENZI Msaidizi wa Huduma za Afya kutoka Ofisi ya Waziri Mkuu – TAMISEMI, Dkt. Paul Chaote, amesema kuwa kuimarisha elimu ya afya kwa jamii, matumizi ya takwimu sahihi na ufuatiliaji wa karibu ni msingi wa kuboresha utoaji wa huduma za chanjo nchini.
Amesema kuwa bila vipengele hivyo, juhudi za kufikia watoto wote wanaolengwa haziwezi kuleta matokeo yaliyokusudiwa.
Akihitimisha Mafunzo ya Uongozi wa Kati (Mid-Level Management – MLM) kuhusu Chanjo yaliyofanyika Mkoani Iringa, Dkt. Chaote amesema mafunzo hayo yamelenga kuwawezesha wasimamizi wa huduma za afya kusimamia kwa ufanisi programu za chanjo katika maeneo yao ya kazi.
“Mafanikio ya huduma za chanjo yanategemea sana usimamizi wa karibu, ufuatiliaji wa mara kwa mara na uwajibikaji katika ngazi zote za utoaji huduma,” amesema Dkt. Chaote.
Aidha, amesema kuwa takwimu sahihi, kamili na kwa wakati ni nyenzo muhimu katika kupanga na kufanya maamuzi sahihi kwenye sekta ya afya.
“Takwimu ndizo dira ya mipango yetu; bila takwimu sahihi hatuwezi kujua tulipotoka, tulipo na tunapokwenda,” amesema, huku akihimiza matumizi sahihi ya taarifa za chanjo katika halmashauri na vituo vya kutolea huduma.
Pia amesema kuwa kuimarishwa kwa elimu ya afya kwa jamii kuhusu chanjo kutasaidia kuongeza mwitikio wa wananchi na kupunguza imani potofu.
“Jamii ikielewa umuhimu wa chanjo, inakuwa mshirika muhimu katika kulinda afya ya watoto na taifa kwa ujumla,” amesema.
Kwa upande wake, Dkt. Tumaini Haonga, Ofisa kutoka Mpango wa Taifa wa Chanjo wa Wizara ya Afya, amesema mafunzo ya MLM yana mchango mkubwa katika kujenga uwezo wa wasimamizi wa sekta ya afya.
“Mafunzo haya yanaimarisha uwezo wa kupanga, kufuatilia na kutekeleza programu za chanjo kwa ufanisi zaidi, hasa katika ngazi za halmashauri,” amesema Dkt. Haonga, akisisitiza umuhimu wa ushirikiano kati ya Wizara ya Afya na TAMISEMI.
Mafunzo ya MLM yaliyofanyika Mkoani Iringa yamelenga kuimarisha usimamizi wa huduma za chanjo kwa lengo la kuboresha afya ya mama na mtoto, ambapo washiriki wote wa mafunzo walitunukiwa vyeti mara baada ya kukamilisha mafunzo hayo.
