Wapongeza Nyongeza Ya Likizo Kwa Aliyejifungua Mtoto Njiti

Na Lucy Lyatuu

CHAMA cha  Wafanyakazi Wa Serikali Na Afya Tanzania (TUGHE) kwa kushirikiana na  wadau mbalimbali wamepongeza hatua ya serikali  kupitisha  sheria kuwa  likizo ya uzazi kwa mwajiriwa aliyejifungua mtoto njiti kujumuishwa  kuwa wiki 40 za ujauzito.

Aidha sheria hiyo imepitisha baba kupewa nyongeza ya likizo ya uzazi kutoka siku tatu na kuwa siku saba kwa wafanyakazi waliojifungua mtoto njiti.

Pongezi hizo zimetolewa Dar es Salaam na Makamu Mwenyekiti wa Tughe , Dk Jane Madete kwa kushirikiana na mtandao wa haki ya afya ya uzazi na taasisi ya Doris Mollel Foundation.

Akizungumza Madete amesema suala la nyongeza ya uzazi kwa wafanyakazi waliojifungua mtoto njiti lilikuwa ni maombi ya muda mrefu yaliyoasisiwa na Taasisi ya Doris Mollel Foundation tangu mwaka 2017 na baadae mwaka 2023 kuungana na mtandao wa haki ya afya   pamoja na Tughe ili kuhakikisha suala hilo libakubalika.

Aidha amesema Shirikisho la Vyama vya Wafanyakazi  Tanzania (TUCTA ) lilibeba suala hilo na mwaka jana 2024  liliwakilishwa kwenye siku ya Wafanyakazi  ambapo Januari 31,2025 serikali ilipitisha rasmi  kuwa sheria.

“Kwa pamoja tumekuja kutoa pongezi  za shukrani  pamoja na Bunge la Jamhuri ya Tanzania  kupitisha maombi hayo kuwa sheria kuanzia sasa, ” amesema.

Amesema akiwasilisha Bungeni  maelezo ya Mswaada wa marekebisho ya sheria za kazi namba 13 wa mwaka 2024,Waziri wa Madini  Anthony Mavunde kwa niaba ya Waziri wa Nchi Ofisi Ya Waziri Mkuu, Kazi, Vijana, Ajira Na Wenye Ulemavu, Ridhiwan Kikwete  alieleza kuwa kuanzia sasa mfanyakazi atakayejifungua mtoto njiti likizo yake itaisha  baada ya kufikisha wiki 40 ya ujauzito  na baba kupewa siku saba za mapumziko.

Madete amesema kwa pamoja TUCTA, TUGHE na Taasisi ya Doris Mollel na Mtandao wa HakibYa Afya Ya Uzazi tunapongeza hatua hiyo kwani itasaidia  kuimarisha ustawi wa mfanyakazi.

Amesema kabla ya sheria hiyo ilikuwa ni changamoto kwa mfanyakazi ikiwemo ya afya kwani wanahitaji muda mwingi wa kupumzika pia kuhudumia mtoto tangu kipindi cha uangalizi anaporuhusiwa kutoka hospitali.

“Mbali na changamoto hiyo ya kiafya pia wamekuwa wakipoteza ajira zao jambo linalosababisha kupata msongo wa mawazo hata kuathiri malezi ya mtoto aliyezaliwa, ‘ amesema.

Amesema kufuatia nyongeza hiyo ya likizo itasaidia wanawake hao kupata muda wa kutosha kuhudumia mtoto kwa kipindi chote bila kuwa na wasiwasi na kupoteza ajira.

Amesema na akiwa kazini afya itakuwa imara na kufanya kazi kwa tija hivyo wanaipongeza serikali kwa hatua hiyo.