Na Mwandishi Wetu
WAFAMYABIASHARA wa mbolea nchini wametakiwa kushirikiana na serikali kutoa elimu ya matumizi sahihi ya mbolea kwa wakulima.
Wito huo umetolewa na Kaimu Meneja wa Mamalaka ya Udhibiti wa Mbolea Tanzania (TFRA), Kanda ya Nyanda za Juu Kusini, Joshua Ng’ondya wakati akizungumza kwa niaba ya Mkurugenzi Mtendaji Joel Laurent aliyekuwa mgeni rasmi wakati wa uzinduzi wa Chama cha Wafanyabiashara wa Mbolea wa Nyanda za Juu Kusini (SHAU) na Mkutano Mkuu wa wanachama wake uliofanyika katika ukumbi wa TUGHIMBE , Mbeya.
Ng’ondya amesema, hivi karibuni Mamlaka imezindua kampeni ya Kilimo ni Mbolea yenye lengo la kuhamasisha matumizi sahihi ya mbolea pamoja na usajili wa wakulima na kuwasihi wafanyabiashara hao kuwa miongoni mwa watekelezaji wa utoaji wa elimu ya mbolea kwa wakulima ili kuongeza uzalishaji na baadaye kukuza uchumi wa mtu mmojammoja na taifa kwa ujumla.
Aidha, amewataka wafanyabiashara hao kuwa waaminifu na waadilifu ili kuepuka mkono wa sheria na kueleza Serikali haitamfumbia macho yeyote atakayekiuka na kuuza mbolea za ruzuku kinyume na taratibu zilizowekwa.
Pamoja na hayo, Ng’ondya aliwataka mawakala hao kuwahamasisha wakulima kujisajili ili waweze kunufaika na mbolea za ruzuku na kwa upande wa wafanyabiashara amewataka kuonyana wao kwa wao pindi wanapomwona mmoja wao akikiuka taratibu ili kumwepusha na changamoto ya kuona biashara anayoifanya ni kero badala yake impe manufaa.
Amesema, lengo la kutoa ruzuku ya mbolea ni kuwasaidia wakulima waweze kupunguza gharama za uzalishaji na kuwafanya wakulima wazalishe kwa tija.
Kwa upande wake Katibu Tawala wa Wilaya ya Mbeya Mohamed Aziz Fakihi ameeleza kuwa, serikali inapenda kuona umoja huo unafanya vizuri ili kuwanufaisha wakulima kwa kuwafikishia pembejeo katika maeneo yao na kwa wakati unaofaa.
