VIONGOZI mbalimbali kutoka Shirikisho la Vyama vya Wafanyakazi Tanzania (TUCTA) wamejitosa katika kinyang’anyiro cha ubunge kupitia majimbo na viti maalum, kutokana na uteuzi wa awali wa wagombea nchini.
Katika Mkoa wa Mtwara, Asha Moto, ambaye ni Katibu wa Wanawake wa TUCTA, anawania Viti Maalum.
Asha amekuwa mstari wa mbele katika kusimamia haki za wanawake mahali pa kazi na kupigania mazingira bora ya kazi, anachuana na Agnes Hokororo, Dkt. Rahman Hingora, Athumin Mapalilo, Days Ibrahimu na Jane Chikomo.
Naye Mwenyekiti wa Chama cha Wafanyakazi wa Serikali na Afya Tanzania (TUGHE) , Joel Kaminyoge, amepitishwa kuwania Jimbo la Ileje.
Klaminyoge anachuana na wagombea wengine akiwemo Stella Fiyao, Godfrey Msongwe, Eliud Ndabila, Epson Ngambo, Ezekiel Kibona na Claudio Kitta.
Miongoni mwa viongozi wengine waliojitokeza ni Makamu Mwenyekiti Taifa wa Chama cha Wafanyakazi wa Serikali za Mitaa Tanzania (TALGWU), Ronward Mwashiuya, anayewania Jimbo la Songwe.
Wagombea wengine katika jimbo hilo ni Philipo Mulugu, Philemon Msomba, Maria Bilia na Tedius Mwachipindi.
Pia Katibu Mkuu wa TALGWU, Rashid Mtima, yupo kwenye kinyang’anyiro cha Jimbo la Newala Mjini, akichuana na Zafarani Madayi, Zuhura Mkumba na Yahya Mnung’a.
Kwa upande wa Viti Maalum Mkoa wa Morogoro, Mwenyekiti wa Chama cha Wafanyakazi wa Sekta za Utafiti, Taaluma na Mashirika (RAAWU), Jane Mihanje, anawania nafasi hiyo sambamba na Amina Karuma, Sheila Lukuba, Hajira Mwikoko, Lucy Kombani, Kulwa Kangeta, Aliyah Omar, Rachel Mashishanga na Josephine Kupuna.
Mkoani Katavi, Katibu wa TALGWU mkoa huo, Angela Ntemo, anagombea nafasi ya Viti Maalum akiwa pamoja na Martha Mariki, Askari Mbogo, Fortunately Kabeja, Stella Chenchele, Janeth Pinda, Elizabeth Sultan na Mahija Nyembo.
Aidha, Silfa Kapinga, Mkuu wa Idara ya Elimu kutoka TUICO, ameomba kuteuliwa kuwania Viti Maalum vya wafanyakazi.
TUCTA ni shirikisho linalounganisha vyama mbalimbali vya wafanyakazi katika sekta ya umma na binafsi nchini, likishughulikia masuala ya ustawi wa wafanyakazi, haki zao, usalama kazini, na kutoa sauti ya pamoja katika majadiliano na serikali au waajiri.
Vyama vilivyo chini ya TUCTA ni pamoja na: Chama cha Wafanyakazi wa Serikali za Mitaa Tanzania (TALGWU), Chama cha Wafanyakazi wa Elimu ya Juu (RAAWU), Chama cha Wafanyakazi wa Viwanda, Biashara, Taasisi za Fedha, Huduma na Ushauri (TUICO), Chama cha Wafanyakazi wa Serikali Kuu na Afya (TUGHE), Chama cha Wafanyakazi wa Migodini, Nishati na Ujenzi (RAMICO), Chama cha Wafanyakazi wa Mawasiliano (COWTU( T) na vinginevyo.
