TEA Yapitia Mpango Mpya Wa Miaka Mitano

MOROGORO: MAMLAKA ya Elimu Tanzania (TEA) imeanza hatua za kuandaa mwelekeo mpya wa utekelezaji wa majukumu yake kwa miaka mitano ijayo, baada ya Baraza la Wafanyakazi kujadili Mpango Mkakati wa Tano wa 2026/27–2030/31.

Katika kikao hicho, wajumbe wa Baraza la Wafanyakazi pia wametathmini utekelezaji wa Mpango Mkakati wa Nne wa 2021/22–2025/26 ili kubaini mafanikio yaliyopatikana na maeneo yanayohitaji kuimarishwa.

Akizungumza katika Kikao cha Pili cha Baraza la Tatu la Wafanyakazi wa TEA, Mwenyekiti wa Baraza hilo ambaye pia ni Mkurugenzi Mkuu wa Mamlaka hiyo, Dkt. Erasmus Kipesha, amesisitiza umuhimu wa wajumbe kutoa maoni na kushiriki kikamilifu katika kuboresha mpango huo.

Amesema ushiriki wa wafanyakazi ni muhimu katika kuhakikisha mpango unaoandaliwa unaakisi vipaumbele vya Mamlaka na kuwezesha utekelezaji wa majukumu yake kwa ufanisi.

Mpango Mkakati wa Tano umezingatia miongozo mbalimbali ya kitaifa na kimataifa, ikiwemo Dira ya Maendeleo ya Taifa 2050, Sera ya Elimu na Mafunzo ya mwaka 2023 pamoja na Malengo ya Maendeleo Endelevu.

Katika kikao hicho kilichofanyika Morogoro Novemba 2 na 3, 2026, wajumbe pia walijadili taarifa ya mapitio ya Sheria ya Mfuko wa Elimu ya mwaka 2001, hatua inayolenga kuimarisha utendaji na ufanisi wa Mamlaka hiyo.