Na Mwandishi Wetu
ARUSHA: WAZIRI Mkuu Kassim Majaliwa amewaagiza wahandisi nchini kuzingatia miiko na maadili ya taalum yao, ikiwa ni pamoja na kuitekeleza miradi ya ujenzi kwa ubora unaoendana na thamani ya fedha halisi iliyotolewa.
Majaliwa ameyasema hayo katika Kongamano la Kimataifa la 14 la Taasisi ya Wahandisi Tanzania (IET), lililofanyika Kituo cha Mikutano cha Kimataifa cha Arusha (AICC).
“Sote tunatambua kwamba wapo wachache katika taaluma yenu ya uhandisi ambao wanaichafua kwa kufanya matendo ambayo ni kinyume na taaluma lakini pia ni kinyume na maadili.
“Matendo hayo ni pamoja na rushwa, ubadhilifu, na ukosefu wa weledi. Hii si tu kwamba inachafua taaluma ya uhandisi, bali pia inaharibu taswira ya nchi,” amesema.
Ameiagiza Bodi ya Usajili wa Wahandisi isimamie maadili ya kihandisi na makampuni ya kihandisi kwa mujibu wa sheria ili kulinda hadhi ya uhandisi nchini.
Vile vile ametoa rai kwa Taasisi ya Wahandisi Tanzania (IET) kuendelea kushirikiana na vyombo mbalimbali kuwabaini wanaokiuka maadili na sheria na kuchukua hatua stahiki kwani taaluma ya uhandisi ni muhimu na inapaswa kutunza na kulinda heshima yake.
Katika hatua nyingine, Majaliwa amezielekeza Mamlaka za Serikali za Mitaa na Usalama Barabarani kuhakikisha kuwa vizuizi na vituo vya ukaguzi vinazingatia usalama wa watumiaji na tahadhari zote za kiusalama.
“Wahandisi na wataalamu wetu mnao wajibu wa kuendelea kubuni na kupendekeza mifumo bora ya alama za barabarani, usimamizi wa miundombinu ya barabarana uwekaji wa vituo vya ukaguzi ili kupunguza ajali na madhara yake.”
